Ye Un Dinon Ki Baat Hai ! – Valentine Story Contest

Warning :– Kahani poorn roop se kalpnik hai . Kisi bhi ghatna ya jeevit mrit vyakti se iska koi lena dena nahi hai .kisi bhi jati dharm ya kisi vishesh paristhiti se kahani ko jod kar na dekha jaye. Kisi ko bhi agar kahani ki wajah se thes pahunchti hsi to sorry !

Ye un dinon ki baat hai !

Ye unn dinon ki baat hai jab Banaras ka shant aur manmohak vatavaran desh duniyan me apni chhap chhpd raha tha . Ganga nadi ke sundar ghat dekhne walon ki najron ko baandh lete the to wahi etihasik mahatwa liye huye tamaam imartein desh videsh se aaye paryatkon ki bheed ke beech khadi apne astitwa par itrati thi .

Ye unn dinon ki baat hai jab Sab kuchh shanti poorwak chal raha tha . Bemisal ekta thi logon me . Holi ka rangeela tyohar sir par tha . Banaras ki galiyan holi ke rango aur gujhiya ki khushbu se labrej thi . Banarsi paan aur kali mirch wali thandai har gali ki shan bani huyi thi .

Aise hi Banaras ki galiyon me Firdaus aur Gaurav ka pyaar bhi aakar le raha tha . Ghar se college aate jaate bas khamosh nigahon se ek doosre ko takte rahna inn dono ka pasandeeda kaam tha . baatein inki jubaan nahi karti thi par nigaahein har pal shor machati thi . Ye dono har jagah paas dikhte the bhale hi saath nahi hote the . jaise agar Firdaus golgappe khane gayi hai to Gaurav baju me hi launglata wale ( traditional sweet ) ki dukan par doston ke sath dera jamaye rakhta tha . Isi tarike ke kayi thikane Firdaus ki masoomiyat to Gaurav ki Aashiqui ki gawahi dete the .

Do saal beet gaye aankhein ladate huye to Gaurav ne than li apni muhobbat ka ijhaar karne ki . Waise bhi inn dono ke alawa sabhi jaan gaye the ki ye dono ek doosre par dil o jaan se marte the . Inhi dono ko apni chahton ko shabdiya jama pahanana tha lekin isase pahle ki gaurav himmat karta dil ki baat kahne ki achanak Banaras ki sukh shanti ko kisi ki najar lag gayi .

Jane kisne bo diya masoom dilon me nafrat ka beej . Halaat bekabu hone lage . Charon taraf faile dange fasaad ke ajgar ne banaras ko nigal liya . kali raton me nafarat ka jahar ghul gaya . Har gali muhalle me Log guton me najar aane lage . har taraf talwar khanjar tane tahlne lage khoon ke pyaase log jinka koi dharm ya majab nahi tha aur nishana sirf masoom log jinko inki nafrat se koi wasta nahi thi tha .

Tamam ladkiyon ki tarah Firdaus ko bhi ghar me kaid kar diya gaya par uske sapno ko kaun kaud kar sakta tha usme to 24 ghante uske sapno ka shahjada Gaurav chhaya rahta tha . Firdaus poore do din yani ki 48 ghanto se usko dekh nahi paayi thi . Uski tadap sirf pahle pyaar me deedar ke liye tarsta premi hi samjh sakta tha . Bechaini thi ki shant hi nahi ho rahi thi . Jab apni bebsi se use ghutan hone lagito jaa pahunchi chhand se baat karne apne abbu ki vishal haweli ke chhajje par .

Chand hi tha jo uska dard samjh sakta tha kyu ki wo bhi to akela tadpta rahta tha aasmaan me . Usme apne mahboob ka deedar karti firdaus ko achank kisi ki ghuti ghuti si cheekh sunayi di jo ghar ke pichhwade ki taraf aa rahi thi . Ghar ke peechhe side bhi ek darwaja tha par aam taur par uss darwaje ka istemaal sirf naukar hi karte the . Firdaus teji se peechhe ki taraf ke chhajje par gayi aur neeche dekhne lagi .

Peechhe ka Manjar firdaus ka dil dahla gaya . uske bhai ke dost kisi ladki ko ghaseet kar peechhe ke raste haweli me le jane ki koshish kar rahe the . Ladki ke muhh par kapda bandha hua tha . Wo badi hi buri tarah chhatpata rahi thi . Firdaus ko mamla samjhte jara bhi der nahi lagi aur wo kood padi ladki ko bachane . Firdaus jab paas me pahunchi to usne dekha ki ladki ka naa sirf chehra dupatte se chhipa hua tha balki uske haath aur pair bhi peechhe ki side bandhe huye the . Firdaus ne aisi koi harkat ki ummid kam se kam apne gharwalon se to nahi ki thi . Wo gusse se kampne lagi . Usko aaya dekh sabhi baukhla gaye .

Firdaus ne aaw dekha na taaw aur paas padi talwar haath me utha li tab tak uska bhai bhi aa gaya wahan . Khoob jubaani jung huyi firdaus aur uske bhai me .

Firdaus ne jab apne bhai ko ehsaas karaya ki ” kabhi aurat ka apman nahi karna chahiye kyu ki mard ko mard aurat banati hai aur uspar haath uthane wala aur julm karne wala mard nahi namard hota hai ” to bhai ke sabra ka baandh toot gaya aur bhai ke majboot haanthon se tamacha kha kar firdaus ke hoonthon se khoon nikal pada lekin fir bhi wo uss ladki ko bachane ke liye joojhti rahi . Bhai ne bhi Firdaus ko iss baat ka ehsaas karaya ki ” iss ladki ke saath jo bhi ho raha hai uski wajah aur koi nahi balki Firdaus hai .” Jiska matlab samjhne me firdaus ko kafi wakt lag gaya .

Apne bhai ko nafrat se dekhti Firdaus uss ladki ki ijjat bachane ke liye apne jism par jakhm khati rahi aur apne bhai par bhi talwar se vaar kar baithi Par sirf ijjat hi bacha payi uss masoom ladki ki uski jaan nahi . jab ladki ka nirjeew shareer jameen par gira to uske chehre ko dhakne wala dupatta khul gaya . Wo koi aur nahi balki Firdaus ke gaurav ki chhoti bahan thi jise wo jaan se jyada pyaar karta tha . Firdaus ko pal bhar me hi sara manjra samjh aa gaya . Use aa gaya samjh ki uske bhai ne uske aur Gaurav ke ankahe rishte ki wajah se ye paap kar diya hai . Wo sudh budh kho bathi behosh hokar jameen par gir gayi .

## # 25 years later ###
——————————————–

Banaras ki galiyon me ek aadhunik sukh suvidhaon se yukt tourist bus achanak hi aag ki lapton me ghir uthi thi . Is bus me sabhi videshi sailani sawaar the jo apne mulk se bharat darshan ko aaye the . Jis wakt ye hadsa hua raat hone lagi thi . Bas ke charon taraf bheed ikatthi thi par madad ke liye koi aage nahi aa raha tha . Theek usi wakt kuchh 10 -12 ladkon ka group jo coaching se wapas aa rahe the wahan se gujare . Ye ladka Sameer tha jise samaj sewa jaan se pyaari thi aur logon ki madad karna uska shauk tha .

Sameer aur uske doston ne jaan par khel kar bas me sawaar sabhi yatriyon ki na sirf jaan bachai balki sabhi ko paas ke hospital bhi pahunchaya . Kuchh logon ki haalat bahut karab thi lekin sabhi do ke group me the lekin ek ladki jo bilkul akeli thi wo bahut jyada dari huyi thi . Use yun to koi gambheer chot nahi aayi thi par uske andar itni dahshat sama gayi thi ki wo Sameer ka haath hi nahi chhod rahi thi . Ladki ki umar koi 19 saal thi . Behad gori bilkul doodh si rangat thi uski aur aankhein aisi ki kisi ko bhi asaani se ghar ki raah bhula dain .

wo ladki lagatar Sameer ka haath thame uske sath chal rahi thi . Sameer ne kafi pata kiya uske baare me par jab kuchh bhi samjh nahi aaya to use apne ghar le aaya . Wo ladki bhi bina kuchh bole Sameer ke peechhe peechhe uske ghar ja pahunch gayi . Sameer ke ghar walon ko bhi ye bas wali ghatna ka pata chal gaya tha . Sameer ke pita ka rutba Banaras me achchha khasa tha . Sameer ke sath aayi us ladki se sabhi ko hamdardi thi .

Sabhi use gher kar baith gaye par wo ladki ab bhi Sameer ka haath thame thi . Sameer ki dadi ne turant family dr ko call ki kyu ki unko poora yakeen tha ladki ko mansik aaghat pahuncha hai .
Dr ne bhi yahi kaha aur kuchh dawaiyan dekar chale gaye . Dadi ne us ladki ko bade pyaar se khana khilaya aur sula diya . News me bhi yahi ghatna chhai huyi thi par ghatna ki wajah ka khulasa nahi hua tha . Shahar ke halaat bigadna shuru ho gaye the . Kuchh guton ne is ghatna ka fayeda apne swarth ke liye uthana shuru kar diya tha .

Subah jab us ladki ko hosh aaya to use Sameer ke pita ne bahar baithak me bulwaya . Ladki ko sabse pahle chai nashta diya gaya . Sameer ko wo din ki roshni me raat se kahi jyada haseen lagi . Uska dil to seene me tika hi nahi aur kood kar us ladki ke pahlu me gum ho gaya . Sameer ke pita ne jab us ladki se uska naam poonchha to wo Sameer ko dekhte huye sirf itna boli ” I am Jannat Kidwai from UAE ” itna sunte hi to Sameer ki dadi ke tan badan me aag lag gayi jabki Sameer ke pita Gahrav awaak se paristhiti ko samjhne ki koshish karte rahe .

Tabhi us ladki ne ek paper par Firdaus ke ghar ka address likha aur aage badha diya . Quyamat se pahle hi Quyamat aa gayi jab dadi ne us paper par Firdaus ke ghar ka pata dekha .chilla padi dadi ki ye ladki is ghar me nahi rah sakti , bhagao ise yahan se . Sabhi sakte me the . Koi apni jagah se jab hila bhi nahi to khud dadi ne jannat ka haath pakda aur kheenchti huyi mukhya dwaar se bahar dhakel aayi .

Koi bhi us ladki jannat se seedhe muhh baat nahi kar raha tha , yahan tak ki uske diye gaye pate par bhi chhodne koi nahj ja raha tha . Wo ladki bahut buri tarah dar gayi thi . Dahshat se chehra safed pad gaya tha . Dadi ne jaise hi apne ghar ka darwaja band ki us ladki ki jaan halaq tak aa gayi . Charo taraf sabhi use ghoor rahe the . Ladki abb bhi Sameer ke ghar ke darwaje se chipki khadi thi aur darwaja kholne ka anurodh kar rahi thi . Ghar ke andar se dadi ke chillane ki awaaj aa rahi thi ki ” wo apni beti ke guneh gaaron ki koi sahayta nahi karengi aur jo sahayta karega usase rishta khatm kar lengi .”

Jab andar se awaajein aana band ho gayi to Jannat sahmi si gali me aage ki ore badh gayi . Sabhi use kha jane wali najron se dekh rahe the . Kisi najar me nafrat thi to kisi me hairat aur sawaal . Jannat thodi door hi aayi thi kampte kadmo se . Kal raat se hi wo kafi dari huyi thi . Achanak uske peechhe kisi ke daudne ki awaaj aayi . Jannat ka gala sookh gaya aur reedh ki haddi me tandi lahar daud gayi . Kampti huyi peechhe mudi to hamfta hua Sameer khada tha . Kuchh nahi soojha Jannat ko wo bas doud kar Sameer ke seene me muhh chhipa kar khadi ho gayi . Sameer ne bhi usko apni baahon ke ghere me chhipa kar usko mahfooj hone ka ehsaas karaya .

Sameer use haweli chhodne gaya . Aaj pahli baar wo haweli ke bheetar tak gaya tha . Jannat ne Sameer ko chai ke liye bithaya . Sameer ne charon taraf najar daudai aur poonchha ki yahan kaun rahta hai kyu ki use to ye haweli hamesha veeran hi dikhti hai . Thodi der khamoshi ke baad Jannat ne bataya ki yahan uske dada ji aur bua Firdaus rahte hain . Bua Firdaus ki mansik halat theek nahi hone ki wajah se haweli me koi raunak nahj rahti hai . Jannat ke pita uske janm se pahle hi UAE me bas gaye the . Wo log bharat laut kar kabhi nahi aaye aur Jannat jidd karke apne University doston ke sath yahan aayi hai .

Jannat ko haweli me chhod kar Sameer wapas chala gaya par apna dil bhi Jannat ko saump aaya tha . Jannat bhi dhadkte dil se tab tak sadak par dekhti rahi jab tak Sameer aankhon se ojhal nahi ho gaya . Ek baar fir se Firdaus aur gaurav ki tarah ek prem kahani ne angdayi leni shuru kar di thi . Ye un dino ki baat hai jab Fir se hawaaon me muhobbat ki khushbu ghulne lagi thi .