Update 7
Der raat tak pada-pada sochta raha apni beeti jindagi ke baare mein, jise uske sage pita aur bhaiyon ne to kabhi samajha hi nahi, lekin dusron ne kabhi bhulaya nahi uski achhaiyon ko…
Dimag mein uske janm se sambandhit baaten, jo uski maa aur anya gharwalon se pata chali thi, ghoomne lagi ki kin visham paristhitiyon mein uska janam hua tha….? aur kyon…?
Roshan bhaiya jab 12th standard mein the tabhi unki sadi kar di gayi, us vakt Shayam bhaiya ki umra kareeb 1 saal thi,
bete ki sadi ke 2 saal baad maa fir se garbhwati ho gayi, ye baat jab unhone apne pati ko batai to sanskaari Janki lal dukhi ho gaye….
Ye theek nahi hua Padma… bahu kya sochegi hamare baare mein, log kahenge ki budhape mein bhi inko chain nahi hai….
Abhi to bahu ke bachche hone wale hain aur saas abhi-bhi bachche paida kar rahi hai…
To ab kya karen ji…. Padmavati pati ki baat se sahamat hote hue boli…
Ek kaam karo, tum garam cheejen khana shuru kardo, abhi jyada samay nahi hua hai, ho sakta hai garbh-paat ho jaaye…
Theek hai koshish karte hai…
gaon se 35-40 km se pahle koi bada shahar hi nahi tha jahaan uchit doctor ki salah li jaa sake, sabhi log dehati nuskhe ya vaid-hakim ke paas hi ilaj karate they jyadatar,
aur gaon ke vaidh ji bhi Janki Lal ke gaon ke riste ke bade bhai lagte they, lekin sharm ki vajah se unhone unhen bhi puchhna uchit nahi samjha aur jo uchit laga wo salah de di…
Udhar maa apne patidev ki salah dhyan mein rakh kar ulti-seedhi garam cheejen kut-kut ke khane lagi, halanki unhen uska dushprabhav bhi hua, lekin kya kar sakti thi wo.
Din niklte gaye koi natija nahi nikla, ab to ye bhi sambhavna nahi thi ki bachcha jinda bhi hai ya nahi ?
lekin garbh-pat to nahi hua. Lihaja unhone wo sab cheegen khana band kardiya, lekin uska dushprabhav to ho chuka tha..
Sasu ji ke garbhadhan ke lagbhag 4 mahine baad hi bahu ke paav bhi bhari ho gaye, jaise hi ye baat sas-sasur ko pata lagi, wo dono baichain ho gaye, lekin dikhane ke liye khushiyan manani bhi jaruri thi,
majburan apne garbh ki baat bhi maa ko ujagar karni hi padi, aur na chahte hue bhi sabhi logon ko swikaar bhi kar lena pada…
khaskar unke donon bade beton ko bada bura lag raha tha…
Antatah wo samay aa hi gaya jab us un-chahe jeev ko iss darati par ana tha..
Jyeshth (may-june) ka mahina tha subhah ke pone teen ya chaar baje bachche ( arun) ka janm hua, bahut der tak bachche ke muh se koi awaj nahi nikli, bas thodi si sharir mein halchal hui, aur fir band ho gai….
Sharir kya? bas ek pona-ek kilo ka halke peele kathai rang ka bahut hi patla sa jaise ki koi khilona ho aur uspe sharir ke ang sketch kar diye hon bas…
Thodi der tatol-tatal ne ke baad dai ko jab koi pratikriya bachche ki taraf se nahi dikhi, to usne use mrut ghosit kar diya…
