My Life @Jindgi Ek Safar Begana – Update 21

Update 21

Ek mahine baad final exam shuru ho gaye, sab usmein busy ho gaye..

Ek saal kaise beet gaya, pata hi nahi chala, kuchh khatti-meethi yadon ke beech kahna padega …it was not bad.

is ek saal ke college ke anubhav ne mere self confidance ko aur badha diya tha, bachpan se chacha ke sath beete mere dino ki vajah se jo dileri aa chuki thi, wo aaj kargar siddh ho rahi thi.

exam gujar gaya, LY wale chale gaye, hum SY mein aa gaye, naye admission shuru hue, raging ki pratha fir ek baar shuru hui, mere doston ne bhi kaha, ki yaar chalo kisi ki raging karte hain, mene mana kardiya, ki dekho bhai, mein koi aisa kaam nahi karana chahta jisase kisi ko kasht ho.

LY students jo drug addict ho gaye they, wo college chhodne se pahle persionally milke gaye, aur mujhe unhone sacche mann se thanks kaha aur accept kiya ki aaj jo unhen degree mili hai, wo meri vajah se hai, varna kya pata wo exam de bhi paate ya nahi, aur dete bhi to kaise?

Un char ladkon ko mene committee membership to di, lekin unka naam gupt rakha aur unhen secrately kaam karne ke liye kaha, jisase information nikalne mein jyada mushkil pesh na aaye.

Classes start ho chuki thi, sab apni-2 study me busy ho gaye.

udhar har hafte rinki ka letter mujhe milta rahta tha, wo intermediate kar chuki thi aur koshish mein thi ki uske papa, aage bhi padhne ki permission de dein.

Is beech, kuchh bahri asmajik tatwa campus mein ghusne ki koshish karte rahte they apne dhandhe ko aage campus mein failane ke liye, chunki hamari team satark thi to unhen chance nahi mil paa raha tha,

Fir bhi darr to rahta hi tha, ki kabhi na kabhi ye fir panpenge aur bacchon ke bhavishya se khilwad karenge. Iska koi parmanant solution to dhudana hi padega.

Mene is babat principle sir se mulakat ki, aur unko request ki agar aap police ka back-up support agar dila sakein to iss samasya ka samadhan nikalne ki koshish ki jaa sakti hai.

Unke sambandh shahar ke SP se ache they, unhone unse milne ke liye request ki, to unhone hamein milne ka samay de diya.

Mein principle ke sath SP office pahuncha, aur unhein is samsya ke nidan ke liye baat ki.

Profl- SP saab, aapko to gyat hi hoga, beete saal hamare college mein ek drug dealing ka case pakda tha, jismein 8 student en mauke par pakde gaye they dealing karte hue..

SP- haan sir mujhe pata hai, aur un aathon par abhi bhi case chal raha hai.

Prof- unko range hathon pakdwane ka shrey, is bacche aur iske 3 anya sathiyon par jata hai..

SP -prashansa bhari nazron se mujhe dekhte hue bole- well did young man.. kya naam hai tumhara…

Me- sir ! Arun…

Profl- tabse leke aaj tak, bahri drug dealers ne kai baar koshish ki hai ghusne ki, lekin arun jaise hamare kuchh aur bhi students hain, jo in cheejon par nazar rakhe hue hain, aur unhen nakam karte rahe hain.

Lekin kab tak,,? Isliye hum chahte hain, ki is burai ka koi sthayi hal khoja jaye, aur is shahar ko bhi isase mukti mil sake. Iske liye arun ke pass ek yojna hai, lekin wo tabhi kargar ho sakti hai, jab usmein police ka support ho.

SP- sure sir hamara mehkama aapki har sambhav madad karega, infact hum bhi is burai ka ant chahte hain. batao arun tumhari kya yojna hai ?

Mene apni yojna unhein samjhai, aur apne 8 naam unhen likh ke diye aur kaha, ki agar in naamon mein se kisi ko bhi police ki jab bhi madad lage unhein turant mile.

Hum SP ke office aur unka personal phone number leke college laut aaye,

Ab mujhe laga ki agar is burai se logon ko nijat dilani hai, to maidan me bina kude ye sambhav nahi hai, ye bhi sambhavna thi ki shayad isme police ke kuchh adhikari bhi shamil hon.

Hostel aakar mene apne committee members ko bulaya, aur unse slah-mashvira karne laga..

Updated SASS members:
active members :- (SY) – Arun, Dhananjay, Rishabh, Jagesh
secrat members :- (LY)- Sagar, Mohan, (TY)- Rohan, Kapil.

Me- doston ab samay aa gaya hai drug mafia ko is shahar se ukhad fenkane ka, jisase na rahega baans, aur na bajegi bansuri.

Ye lo shahar SP ka office aur ghar ka phone number, jab bhi kabhi tum logon ko police ki help ki jarurat lage, turant phone kar sakte ho, hum sabhi ke naam unke office mein hain, aur apna naam batate hi wo har sambhav madad karenge.

Ab dhyan se suno, kal se hi hamein jaldi subah 5 baje uthke gym mein pahunchana hai, aur yatha sambhav jitni jaldi ho sake apne ko is kabil kar lena hai, ki koi bhi tumhen halke me lene ki galti na kar sake.

Sharirk majbuti hamein apne kaam mein safalta dilayegi. Ek hafte baad hum fighting ki practice shuru karenge.

Ek mahine ke baad hum is par action shuru kar denge, kisi ko ismein koi kuchh dikkat lage to abhi bata do.

Sabhi ladke meri shakl is taraf dekh rahe they maano mein koi ajuba hoon.

Jagesh – par yaar arun, hum apne campus par to focus rakhe hue hi hain, fir ye sabse hamara kya matalv? aur humein padhai bhi to karni hoti hai, to in sab baton ke liye samay kahan se milega.

Me- kitne ghante padhai karta hai Jagesh..? 2-4 ya aur jyada. Me teri baat se sahamat hoon ki hum apne campus mein focus rakhe huye hi hain, lekin kab tak? kal ko hamein yahan se jana hoga, uske baad..?

Rohan – to kya jindagi bhar ka hamne koi theka le rakha hai,..?

Mohan – aur in sab chakkron mein padne se hum gundon se seedha-2 panga le rahey hain yaar, hamari jaan ko bhi khatra ho sakta hai aise to.

Me- aur kisi ko kuchh kehna hai is bare mein..?

Thodi der shanti chhai rahi jab kisi ki koi aur pratikriya nahi mili to me bola.

Dekho bhai ! tumhein lagta hai ki ye sab kaam mein kuchh pane ke lalach me, ya mera koi nihit swarth siddh ho raha ho uske liye kar raha hoon, to aisa bilkul nahi hai.

Drug addiction ek samajik burai hai, jo hamare samaj ko sharirk aur arthik dono hi drishti se khokhla kar raha hai, kuchh mutthi bhar log apne swarth purti ke liye ise samaj mein faila rahey hain, lekin ache log aankh band kiye baithe hain, koi iske khilaf kuchh karna hi nahi chahta hai.

Hum logon ne ek chhote se prayas se is burai ko kisi had tak apne college se ukhad fenka hai, jiska natija hum sabke samne hai, is saal ke result ke roop mein.

Socho ab agar hum aur thodi si koshish karen to is shahar ko bhi is burai se mukti dila sakte hain.

Rahi baat gundon se panga lene ki, to agar wo bure kaam ke liye apni jaan ka risk le sakte hain, to kya hum ek ache kaam ke liye risk nahi le sakte ?

Vaise bhi chor ke paav kitne hote hain dost ? ek baar ukhde, to unhen khadedne me jyada waqt nahi lagega.

Socho agar is kaam mein hamein safalta mil jati hai, to hamara hi nahi hamare college ka naam bhi swrnim aksharon me likha jayega, is shahar ke itihas mein.

Aur na jaane kitni hi maaon ki duyaein milengi hamein.

Is chhoti si jindagi me agar kuchh achha karke jaayein to uparwale ke yahaan bhi seena chauda karke jaa sakte hain.

Mere bhai, jindagi to kutte-billi bhi jite hain, lekin sher ke jeene ka andaj hi nirala hota hai.

Mein to bhai gumnami ki jindagi jee nahi sakta, aur mene faisla kar liya hai, ki jahaan tak mere bas mein hoga mein is burai ke khilaf ladta rahunga, ab agar jisko mere sath aana hai, most welcome, aur nahi aana hai to bhi welcome.

Kabir ne kaha hai “Jo ghar funke aapno chale Hamare sath”

bas mujhe aap logon se itna hi kehna hai ki “jillat ki jindagi se izzat ka ek pal hazar baar behtar”

jisko mere sath aana hai, wo subah dot 5 baje gym me mile, itna bol kar mein kamre se bahar nikal gaya, aur peechhe chhod gaya ek gahan sannata.

Dinner ke baad hum apne kamre mein aagaye, mene is Vishay par apni taraf se fir koi baat nahi ki thi, me thodi der apni book leke study karne mein laga tha, ki dhananjay mere pass aake baith gaya.

Mene swaliya nazaron se uski ore dekha.. usne mere hath par apna hath rakh diya aur meri aankhon mein jhankte hue bola..

Dhananjay – arun tu kya hai..?

Me – matalab…? Ye kaisa sawal hai…?

D- itni unchi soch matra 19 saal ke ek sadharan se ladke ki to ho nahi sakti na yaar !!

Hamari baton ko sunkar Rishabh aur Jagesh bhi hamare pass aakar baith gaye..

R- tere jaisa kaleja har kisi ka nahi hai dost !

Mein un logon ki ore dekh kar muskarate hue jagesh se bola…

Jagesh ! sach batana, tune kya soch kar workshop me us laude ko jabab diya tha ki tameez se baat kar..jabki wo 8-8 jane they, aur tu akela…bol kahan se aayi itni daring tujhmein.

J – kya baat karta hai yaar tu bhi…? Me akela kahan tha, tum log bhi to they mere sath..

Me- tujhe kaise laga ki hum tere fate mein taang adayenge..?

J- jhenpte hue… he he he…ab tu meri khinchai kar raha hai, hai na !

Me- nahi me seriously puchh raha hoon, tujhe kaise laga ki hum tere sath hain…

Jagesh- tune hi to kaha tha ki tere rahte hum logon ko koi chhu bhi nahi sakta… to itna to bharosa tha tum logon par mujhe..

Me- humm.. iska matalab tujhe meri baat par bharosa tha…

J- bilkul ! Aur kyon na ho ! tu yaaron ka yaar hai arun ! itna to mein samajh chukka hoon tujhe is ek saal mein.

Me- to fir ab wo bharosa kahaan chala gaya tera..? jo tune sham ko bola tha usase to nahi lagta ki tu mujh par aankh band karke bharosa karta hai..?

D- wo apne college ke andar ka mamla tha bhai, ab jo hum karne ki soch rahe hain wo ek tarah se bahri taqton se seedhi takkar lene jaisa hai, aur wo kitne taqatwar hain hamein ye bhi nahi pata.