Hua bhi aisa kuchh tha … laakh minnate karne par bhi darwaaje tak naa aane wala Viraat aaj subah ki pahli kiran ke sath uth chuka tha aur bilkul ready hokar room ke bahar kone me pade stool par apne hatheliyon ko malta yun baitha tha jaise badi bechaini se kisi ka intjaar kar raha ho … jab ye najara Rudra ne Diya ko dikhaya to pahle to Diya ki khushi ka thikana nahi raha par agle hi pal uski aankhein bhar aayi … jo Viraat kabhi apne naam ki tarah Viraat hua karta tha aaj wo kamjor sa maila kuchaila aur behadd darawna lag raha tha …
Doston aap ne suna hi hoga ki chehra man ka aaina hota hai … jaisi soch man me chalti hai chehra use dharan kar leta hai … Viraat ka sara ojaswa iss prem aur pratadna ke chalte swaaha ho gaya tha … dhanse huye gaal , aankhon ke charo ore bhayank kale ghere , beterteeb bikhre huye baal aur badhi huyi dadhi use kuroop bana rahi thi …
Rudra jab bahar aaya to use dekh Viraat deewaal ka sahara lekar khada ho gaya aur badi lalchayi aur pyaar me doobi najron se Rudra ki sooni baahon ko dekhne laga jisme kal uske liye ek jeeta jaagta khilauna tha … wo khilauna jiski ek jhalak ne patthar ko pighla kar uspar phool khila diya tha …
Rudra bhi thahra maha chalaak kaise haath se niklne deta iss sunahre awasar ko …Pal bhar me hi soch liya tha usne ki Viraat ko abb kaise theek karna hai …
Rudra — Are waah Viraat aaj baahar apne aap aa gaye … kaise ho tum abb ?
Viraat — haan Dr saahab aa gaya bahut pahle hi … aur a… achha hoon …
Viraat ki kamjor awaaj mare bechani ke hakla rahi thi aur uski aankhein charo taraf kuchh khoj rahi thi …
Rudra — kya hua Viraat sab theek to hai naa ? Kuchh pareshan se lag rahe ho ?
Rudra ne naasamjh bante huye poonchha …
Viraat — Dr saahab wo m… meri bitiya … matlab M … Meera ko dekhna chahta hoon … please inkaar mat kariyega …
Viraat ne ye line haath jod kar Rudra se boli , uski bebsi dekh tadap utha Rudra to wahi chhip kar dono ki baad sunti Diya khud ko foot foot kar rone se nahi rok paayi …
Rudra — ooh tum apni bitiya se milne aaye ho par sorry mai nahi milwa sakta tumko …
Rudra ne Viraat ko upar se neeche tak dekhne ke baad kahi ye baat … Viraat kasmsa utha Rudra ki baat sun kar …
Viraat — par kyu Dr saahab maine kya galti kar di … maine naha bhi liya hai aur brush bhi kiya hai …
Viraat ne masoimiyat se chhalak uthi aankhon ko chhipaya aur safaai dete huye kaha …
Rudra — par bitiya ko bimaar aur dadhi wale logon se darr lagta hai … rone lagti hai wo … kya kar sakte hain abb …
Rudra ki iss baat par Viraat ne kisi veer sipahi ki tarah yuddh star par khud ko badlne ki muhim chala di … dawa , khana sab time par dadhi ke gayab hote hi wo puraana wala Viraat apne saamne aa gaya jo jaane kaha gumm ho gaya tha … Rudra ne 6 maheene ke bheetar Bitiya ki ek jhalak ki keemat ke roop me Viraat me ek bade badlaaw ko haasil kar liya tha …
Viraat ke liye jindgi abb sirf Meera j thi … wo hasti to Viraat ke chehre par sukoon rahta aur jab wo roti to poore ghar me use lekar daudta Viraat ki jaane kis kone me uski nanhi pari ki smile chhipi hui hai … ajab khel racha upar wale ne … jis Viraat ko sabne itna sataya use rahat mili to phir usi naam ko shamil kar liya pani jindgi me …
Jab Viraat ka pagal pann hawi hota uss par to use samhalne ke liye uss pari ko hi samne kar diya jata … wo bhi kuchh kam nahi thi … bachpan se hi use pata tha ki kya karna hai … apne nanhe haathon se Viraat ko dawa aur khana khilati … uske aansu ponchhti … bahut takleef bhi hoti thi kyu ki khelne koodne ki umar me uss par bahut badi jimmedari thi … kudrat ka bhi ajab khel …
chhoti meera ke ghunghraale baal aur uski harktein dekh kabhi kabhi Diya ko bhi tajjub hota bilkul Viraat ko copy karti thi wo … Viraat jaise chalti , hasti aur kabhi kabhi to jakar andhere me baith kar Viraat ke dukh ki copy karti aur rokne par kahti ki ” mai Vilaat pappa hoon naa to unke jaichhi ban lai hoon “… ghanto haste sab par Viraat sabse jyada hasta aur har baar chhoti Meera se sorry bolta …
Rudra aur Diya ne bahut bada faisla liya aur jiski sharte Viraat ko bata di … doston pyaar me koi shart nahi hoti hai par jindgi ki apni shartein hoti hain … Viraat ne Rudra ke samne haath jod kar sari shartein maan li aur madad bhi magi … Rudra ke man ka ho raha tha … mehnat to bahut lagi par bahut jald hi Viraat ki jindgi wapas track par aa gayi … aur Viraat ko Diya aur Rudra ne uski bitiya hamesha ke liye saumpne se pahle Rudra ne antim shart batayi …
Rudra — Viraat mai bahut khush hoon tumhare liye … sab sapne sa lag raha hai … tum ko wapas tumhare roop me dekh mujhe bahut khushi ho rahi hai …
Viraat — Dr saahab sab aap ka ahsaan hai warna mera to sab lut hi chuka hai …
Rudra — aisa nahi sochte Viraat … sab theek ho gaya hai … bas ek last baat aur maan lo meri please …
Viraat — aap aadesh kariye mai aapke liye jaan bhi de sakta hoon …
Rudra — Meera ko ek maa chahiye …
Viraat — mai samjha nahi …
Rudra — naa samjhne jaisa kuchh bhi nahi hai … ek jeewan sathi jaruri hota hai jindgi ke safar ko akele nahi kata jaa sakta hai …
Viraat — Meera ki maa to Diya hi rahegi Dr sahab aur pita aap … haan Meera mere jeene ka maksad jaroor ban chuki hai aur kaun kahta hai ki meri koi jeewan sangini nahi hai … Meeru ne chhoda hai mujhe maine nahi chhoda use … wo abb bhi meri muhobbat hai , meri sathi hai aur wahi rahegi … abb kisi aur se wafa mujhse nahi hogi …
Viraat ne hath jodd liye Rudra ke samne … Usko har tareeke se samjhane ki koshish ki Rudra aur Diya ne par wo thahra aashiq kyu sunta kisi ki … Diya aur Rudra ki sahmati se Viraat ne Meera ko kanooni taur par godd le liya … badlte wakt ke sath Viraat bhi badla aur apaar daulat aur prasiddhi bhi hasil kar li par Meeru ka pyaar abb bhi wahi tha uske liye … aur uski tadap ki pratyaksh darshi uski beti jo apne papa ko apni jaan se bhi jyada pyaar karti thi lekin utni hi nafrat apne papa ke gunehgaron se karti thi aur bachpan se hi uske dimaag me papa ka badla loongi aisi baat thi wo alag baat hai ki kisi ne sikhaya nahi tha …
Leave a Reply
You must be logged in to post a comment.