Aisa nahi hai ki Viraat ne Diya ko rokne ki koshish nahi ki ya jo bhi ho raha tha wo uski sahmati se ho raha tha kyu ki Meeru ke chehre par aane wali har ek shikan aur uski aankhon ke aansu Virrat ke dil par bijali ban kar gir rahe the par aaj Diya par jaise apni baat ko kah daalne ka junoon sawaar tha kyu ki Diya unn chand logo me se thi jo Dosti ke rishte ko rishton ki tarah jeete hain …
Diya — Tumse bas itni si request hai ki Hosh khone se pahle poori baat sun lena Meeru kyu ki apni maa ke kaarnamo se abhi poori tarah parichit nahi ho tum … aisa bahut kuchh hua hai jisne tumhari doli ko khooni doli bana diya tha … jaane anjaane tumko apna naseeb banane wala ye Aashiq tumhare muhh ferte hi ujadd gaya tha … galat nahi kahta tha ye ki tumhara saath iska bhagya hai …
Tumhe shopping ke bahane maasi ke ghar bhej diya gaya jabki tum bhi janti ho ki maqsad sirf tumhe Viraat se door karne ka tha … jis din tumne suicide karne ki koshish ki thi ( laajo ne baad me Diya ko batayi thi suicide ki baat ) uss din Viraat ko bechaini hone lagi … shayad tumhari takleef hi uski bechaini ki wajah thi … usse bardaasht nahi hua to wo bhagta hua tumhare ghar pahuncha aur tumhare maa baap ke haath pair jodne laga ki sirf ek baar tumse milwa de … par tumhari maa ke sir par haiwaniyat sawaar thi … Viraat aur uske maa baap ko har hadd tak bhala bura kahne ke baad bhi inka pet nahi bhara aur inhone kiraaye ke gundon ko police ki wardi pahnwa kar bahut bada kand kar dala …
unn bahrupiyon ne Viraat ko Police ban kar pahle to tumhare ghar par hi bahut mara aur police station le jane ke bahane Ek purani puliya ke neeche lekar gaye jahan logo ka ana jana kam hota tha wahan bhi lejaakar adhmare Viraat ko betasha peeta gaya … sabse jyada war uske sir par kiya gaya tha kab tak sahta wo … adhmara to tha thi besudh ho gaya … unn darindon ne use mara hua samjh kar wahi chhod diya aur chalte bane …
Viraat ki kismat me jaane kitna dard sahna likha tha … itni pratadna ke baad bhi uski saansein chalti rahi … unn gundon ko uss puliya ki taraf se nikalte kuchh local logon ne dekh liya aur police ko soochna di jabki doosri taraf Viraat ki family bhi police chauki pahunch chuki thi … doodh ka doodh aur pani ka pani ho gaya kyu ki chand ghanto ki dabish se ek gunda pakda gaya par usne police ke samne muhh nahi kola jabki use akele me ye baat kubool kar li thi ki use Viraat ko marne ke liye ek aurat ne uss ghar me bheja tha …
police team aur Dr Rudra jinse mera rishta ( Diya ) tay hua tha wahan se Viraat ko hospital le gaye jahan se usko ***** refer kar diya gaya lekin Viraat ki aisi haalat dekh uski maa ki mamta dahal gayi … unn ki aankhon ke aansu eklaute bete ko lahuluhaan dekh sookh gaye … patthar ban gayi wo … kabhi nahi jagi uss din ke baad … kuchh hi din baad khyati ( Viraat ki badi bahan ) di ki toot gayi …
Doosri taraf hospital me Viraat ka ghanto chala tha operation … sare shareer ki haddiyan toot gayi thi aur sir me behad gahta ghaaw hua tha … ghaaw itne gahre the ki mahino asptaal me rahna pada upar se sir ki chot … jab Uncle poori tarah kangaal ho gaye to ghar bhi bench diya unhone … kareeb 8 maheene lag gaye Viraat ko recover hone me par abhi bhi uski life ka kasht khatam nahi hua tha kyu ki shareer ke ghaaw to bhar gaye par dil par lage huye ghaaw aur bhi gahre hote jaa rahe the …
Ham sabhi Viraat ko lekar Haridwar jahan Rudra ka clinic tha wahan chale gaye … mere papa ne naa sirf Viraat ke papa aur di ke sath haridwar jane ki ijaajat di balki Rudra ko ye bhi bol diya ki Viraat ko theek karne me abb jitna bhi kharch hoga wo mere papa denge … sach kahoon to Meeru apne papa aur Viraat ke papa ko dekh mujhe teri kismat par taras aaya kyu ki tere papa sirf teri maa ke peechhe chhip kar teri badnaseebi ka tamasha dekh rahe the …
Haridwar me Viraat ka ilaaj shuru hua … par koi khas fayeda nahi ho raha tha kyu ki Viraat me naa jeene ki tamnna thi naa theek hone ki ichchha … dawa khana to door khana b badi mushkil se khata tha … tod fod karta khud ko chot pahunchata rahta tha … Koi raat aisi nahi beet ti thi jab wo Meeru ke naam ki cheekh naa marta ho … maa maa chillata darwaje ko niharta rahta tha … kuchh samjh hi nahi aa raha tha ki aakhir kaise theek hoga … Rudra bhi yahi pareshan rahta tha … Par gaur karne wali baat ye thi ki Meera ka naam lene par Viraat kaabu me aa jata tha isi ko ilaaj banaya Rudra ne ek din baithe baithe usne Viraat ke samne Meeru ko la kar khada kar diya …
