Viraat ko rokne wali Meeru thi jiski aankhon me Aansuon ki kuchh bundon ke sath sath ek gahra avishwash tha … use jarra bhi yakeen nahi ho raha tha ki Viraat uske samne hai … Meeru ke pair buri tarah kamp rahe the … Behad kamjor kadmo ke sath hi sahi par wo Viraat ke samne jakar khadi ho gayi …
Har gujra hua pal Meera ki aankhon ke samne film ki reel ki tarah chalne laga … hansta hua Viraat , rota hua Viraat , use pyaar aur pranay bhari nigahon se taakta hua Virat aur abb ye aaj wala Viraat jiske gaal aansuon se bheege the , honth kaamp rahe the aur aankhon ko jabran meechae huye khada tha … Meeru uska chehra ghoorne lagi… Meera ki saanse achanak hi dhaunkni ki tarah chalne lagi thi … 30 saalon se bichhde huye aaj mile the dono … Adoore pahle pyaar ki tees seene ko saal rahi thi par phir bhi dono ne khud ko saymit rakhne me koi kasar nahi chhodi thi …
charo taraf faili khamoshi me Meera ki saanso ka ahsaas hote hi jab Viraat ne apni aankhein kholi to uski aankhein Meeru ki ghoorti huyi aankhon se jaa takrayi… use dekhte hi Viraat ki aah nikal gayi koi nahi samjh sakta tha ki ye dukh se thi ya khushi ki wajah se thi jabki Meera Viraat ko sir se lekar paaw tak nihaar rahi thi … jaise 30 saalon ki judayi ko aankhon se hi wasool lena chahti ho …
Viraat Meeru ki aankhon me dekh raha tha par Meeru ki aankhon ko to bas apne 30 saal ki taras mitani thi wo Viraat ko sir se pair tak bas dekhe ja rahi thi … Atul ko lekar Sahil jaa chuka tha … Nikhil ka dost bhi Meera ki maa ko bye bol kar hatt gaya tha par Meera ki maa jadd bani Viraat aur Meeru ke khamosh milan ko dekh rahi thi …
ji bhar kar jab dono ne ek doosre ko dekh liya tab Meeru ki kamjor si awaaj Viraat ke kaano se takrayi …
Meera — kitne badal gaye ho tum Viraat pahchan me hi nahi aa rahe ho ?
Meera ne Viraat se baat ki shuruaat ki …
Viraat — mai nahi badla Meeru … abb bhi mai wahi hoon jo pahle tha … baki sabhi badal gaye hain …
Viraat ne talkh awaaj me shikayat ki …
Meera — ham nahi wakt badal gaya hai hamara … Wakt ne hi badal diya hai sab kuchh …
Meera ki awaaj me dil cheer dene wala dard bhara tha …
Viraat — wakt sirf khud ko badlta hai Meeru ham sabhi to apni aur apno ki suvidha ke anusar khud ko badal lete hain … khair kaisi ho tum ?
Viraat khud par kabu hi nahi rakh pa raha tha … uska dil kar raha tha Meera ko kheench kar seene se laga le isi liye dusri taraf muhh fer kar khada ho gaya aur kadwahat gholne laga apni awaaj me …
Meera — Shayad tum sahi bol rahe ho Viraat … haan bilkul sahi bol rahe ho ? Par kya karu kabhi kabhi apne se jyada apno ko mahtwa dena padta hai wo alag baat hai ki hamare apne hi naa dekh paayein…
Meera ne apni maa ko dekhte huye kaha…
Viraat — kaisi ho Meeru ?
Meera — mai … mai bahut achhi hoon Viraat … jaisa maa ne mere liye life select ki thi bilkul waisi hi life mili hai mujhe …aur mera ek pyara sa Sahil bhi hai jo mera bahut khayal rakhta hai… t…tum kaise ho ?
Meera ne bhare gale se kaha …
Viraat — tumhare bin kaisa ho sakta hoon Meeru … akela , adhoora , abhaga … ( Viraat ne ye line boli hi thi tabhi uski nigaah Sahil par gayi jo Atul ke sath jane kab aakar khada ho gaya tha … pal bhar me hi Viraat ne apni lines badal gayi … ) Par mai aisa bilkul nahi hoon … behad khush hoon apni life me … sab kuchh hai mere paas … daulat , shohrat … aur ek behadd pyari si bitiya jisne jindgi ko jindgi bana di hai …
Meera Viraat ki baat sun kar samjh hi nahi paa rahi thi kaise react kare tabhi Sahil ki awaaj sun kar chaunk padi … aur aaj ki mulakat adhhori rah gayi … gile shikwe dil me rah gaye par aankhon me thandak mil gayi thi …
Sahil — mom aap inko janti hain ?
Meera ko khamosh dekh Viraat bol pada…
Viraat — Sahil beta mila phone ? Beta aap mamma aur baki logon ka khas khayal rakho … baki ka police par chhod do …
Sahil ne hami bhar di baat par … tabhi Atul bhi shamil ho gaya …
Sahil — lekin Uncle abb kuchh bhi nahi ho sakta hai … phone to chori ho gaya … sara saboot bhi gaya aur pata bhi nahi chala ki kaun churaya hai…
Sahil ki baat sun Atul ne Viraat ko ek look diya aur dono hasne lage … koi bhi samjh nahi paa raha tha ki sher par sawa sher ne bhi chal chal di hai…
