Meeru apni baat ko kah kar ek baar phir kaphi der se Seene me baandhi huyi siskiyon ko azaad kar deti hai aur foot foot kar rone lagti hai … uske rone me jamane bhar ki tadap shamil thi jo pathar ki bhi aankhon ko nam kar sakti thi … Maa awaak si kisi murti ki tarah jadd apni jagah par baiti Meera ko ek tak dekh rahi thi … Meera ke sir ko sahlaate boodhe haathon ki kampkapi aur bhi jyada badh gayi thi… Aansu yun bah rahe the maa ki aankhon se jaise barson se roka gaya dariya foot gaya ho …
Meera ki sunaai har ek baat baar baar maa ke kaano me goonj rahi thi … Meera jise wo sasuraal ki rani samjhti aa rahi thi uss bhram ke cheethde udd gaye the … Meera ki sabse badi gunehgaar ke roop me wo khud ko katghre me khada paa rahi thi …
Pal bhar me hi smriti patal par barson purani tasweere ubharne lagi … Meera ke janm se lekar aaj tak ki yaadein … isme Meera aur Viraat ka saath tudwana bhi shamil tha aur Viraat ke khilaaf wo sajish bhi jise janne ke baad to shayad hi Meera kabhi maaf kare apni Maa ko…
Wakt ne aaj Meera ki jindgi ko hi ek jakham bana diya tha jiski sutradhar ” Meera ki maa ” thi … maa ne Meera ka sir apne kampkapate haanthon se sahlaya phir apni god se hataya to Meera nirjeev ki bhati apni jajah par padi rahi par achanak Meera ko apne pairon par kuchh boonde tapkti si mahsoos huyi … hairaan Meera ne jab pairon ki ore dekha to pairon par tapkne wali boonde maa ke aansu the jo gir to Meera ke pairon par rahe the par Ek maa ke 30 Saalon ka dard aur gunaah ki maafi maang rahe the … ye najara dekh kar Meera tadap kar maa ke kaleje se chipak gayi to maa rote huye boli …
Maa — mujhse ye kya ho gaya meri bachi … ye kaise kar baithi mai … kyu mujhe meri aulaad ka dard nahi dikha … kyu teri siskiya mere magroor mamta ke seene ko nahi cheer paayi … mujhe maaf kar de meri Meeru mujhe maaf kar de …
Maa ke dono haath jud chuke the aur aaj ek maa apni beti ke saamne sir jhukaye apne kiye ki maafi maang rahi thi … Meera ne lapak kar apni maa ke haathon ko thaam liya aur siskte huye boli…
Meera — nahi maa mujhpe paap mat chadhaiye … aulaad to maa baap ke budhaape ki laathi hoti hai naa … mai bhi hoon maa aise mat roiye aapka sir dukhega aapka … mere bhagya me jo likha tha wo ho gaya maa …
Iss pal me dard bahut tha par maa ka ye sath ek beti ke liye sabse jyada sukh dene wala tha … der ya yun bole andher ho chuka tha Meera ki jindgi par maa ko pakar pagli bilkhte huye shikaton ke pulinde ko kone me feink aayi aur maa ke saath ko apne jindgi me sokhne lagi … bhawukta me maa ne bhi bachi huyi sari umar apni beti ke sath gujarne ka pran kar liya par Maa iss baat se anjaan thi ki abhi to aansuon ki ye pahli kisht thi abhi to kisi aur ke bhi aansuon ka hisaab baaki tha
Doosri taraf Meera( j ) ke milne ke baad se Sahil ki jindgi poori tarah badal si gayi thi … sote – jagte , uthte – baithte sirf aur sirf Meera uske dil o dimaag me ghoomti rahti thi … Pahle pyaar ki dhamak hi aisi hoti hai doston sirf aur sirf ek nasha rahta hai har wakt dilo dimaag par … Sahil badi koshish karta Meera ko apne dil ka haal batane ki par himmat hi nahi kar pata …
Sahil jitna Meera ko pyaar karta tha Meera utna hi Sahil se chidhti thi … yahan tak ki combine practice ke dauran to Meera ne hadd hi kar di jab usne Sahil ko court me pair fansa kar gira diya … Sahil ke ghutne buri tarah foot gaye par Meera kisi Devil ki tarah khushi se jhoom uthi thi … coach ne bahut poonchha par Sahil chup rah gaya usne Meera ka naam nahi liya lekin Monti ko Meera par shaq ho gaya tha …
Monti Sahil ko basket ball court se bahar le gaya … Sahil ka yun bina kuchh bole chale jana Meera ko bada ajeeb laga wo chup chap jahan Sahil baitha tha uss ore badh gayi … Meera jab wahan pahunchi to usne kuchh aisa suna ki usja muh khula ka khula rah gaya…
Leave a Reply
You must be logged in to post a comment.